Teoloq: “Yerlibazlıq müqəddəs kitabda məzəmmət olunur”

Bu barədə Gün.Az-a açıqlamasında teoloq Mirmehdi Seyid Hüseyni bildirib.

Onun sözlərinə görə, İslamın gəlişinin ilk vaxtlarında tayfabazlıq və qəbilələşmə halları geniş yayılmış, insanlar arasında ayrı-seçkiliyə səbəb olurdu.

“İslam dini və onun peyğəmbəri insanları cahiliyyətdən və digər mənfi hallardan uzaqlaşdırmaq məqsədi ilə göndərilib. Odur ki, dinimizin yerlibazlıq və qəbiləbazlıq kimi təkəbbür yaradan hallara qarşı çıxması şübhəyəgəlməzdir. Müqəddəs kitabda da bir neçə dəfə vurğulanmaqla, yerlibazlıq və tayfabazlıq məzəmmət olunur”.

O vurğulayıb ki, “Qurani-Kərim”də Allaha ən yaxın insanın yalnız təqvasına görə müəyyən edildiyi söylənilir.

“Birinin özünü digərindən üstün tutması Allah tərəfindən xoş qarşılanmır. Eləcə də kiminsə öz soyu ilə təkəbbürə dalması haramdır. Peyğəmbərimiz və imamlarımız da dəfələrlə öz ətraflarına tövsiyə ediblər ki, özlərini, yetişdikləri məkanı və gəldiyi soyları başqalarından üstün tutmayaraq təkəbbürdən uzaq olmağa çalışsınlar”.

Rüfət Əhmədzadə
Gün.Az